ҚазМШжЖӨҒЗИ мен ФАО мамандары жайылымдарды қалпына келтіру бойынша семинарлар өткізді

«Қазақ мал шаруашылығы және жемшөп өндірісі ғылыми зерттеу институты» ЖШС-нің (ҚазМШжЖӨҒЗИ) жемшөп өндіру және жайылым бөлімінің ғалымдары БҰҰ-ның Азық-түлік және ауыл шаруашылығы ұйымымен (ФАО) бірлесіп, Қазақстандағы жайылымдық экожүйелерді қалпына келтіру және климатқа төзімділікті арттыруға бағытталған GCP/KZK/005/GFF жобасын іске асыруда.

Жоба аясында Мүгалжар ауданының Талдысай ауылдық округінде және Айтекеби ауданының Аралтогай ауылдық округінде фермерлер мен ауыл шаруашылығы саласының мамандарына арналған екі оқу семинары өткізілді. Семинарлар жайылымдарды ұтымды пайдалану және жемшөп дақылдарының өнімділігін арттырудың заманауи тәсілдерін тәжірибе жүзінде меңгеруге бағытталды.

Қатысушылар топырақты дайындау, ауыл шаруашылығы техникасын тиімді пайдалану, тұқыммен жұмыс істеу және жемшөп дақылдарын себудің заманауи әдістері бойынша практикалық білім алды. Сонымен қатар, топырақ құнарлылығын сақтау, су және ресурс үнемдейтін агротехнологияларды енгізу, климаттық жағдайларға бейімделген әдістерді қолдану мәселелері талқыланды.

Мұндай іс-шаралар тұрақты ауыл шаруашылығын дамытуға, фермерлердің экологиялық жауапкершілігін арттыруға және табиғи ресурстарды тиімді пайдалану жөніндегі ұлттық стратегияны іске асыруға зор үлес қосады.

ҚазМШжЖӨҒЗИ мен ФАО арасындағы бұл бірлескен бастама ғылым мен халықаралық ұйымдардың өзара тиімді ынтымақтастығының үлгісі болып, азық-түлік қауіпсіздігін нығайтуға, ауылдық аумақтарды дамытуға және аграрлық секторды климаттың өзгеруіне бейімдеуге бағытталған.