Маңғыстауда Адай жылқылары қатысқан халықаралық жарыс өтті

2025 жылдың 30–31 мамыры күндері Маңғыстау облысының Кеңдірлі алқабында «Адай» жылқысы патентінің авторларының бірі Сәбит Әбішевті еске алуға арналған, FEI ережесі бойынша 100 және 120 шақырымға халықаралық ат спорты жарысы өтті.

Жарысқа Адай тұқымды 13 жылқы қатысып, оның 5-еуі 100 шақырымды, біреуі 120 шақырымды сәтті еңсеріп, тиісті біліктілік растауларын алды. 100 шақырымдық жарыста бірінші орынды Буйырмыс есімді Адай жылқысы орташа 19,35 шақырым/сағат жылдамдықпен иеленсе, 120 шақырымдық жарыста Найзағай атты жылқы 13,24 шақырым/сағат жылдамдықпен топ жарды.

Қазылар алқасының құрамына ҚазМШжЖӨҒЗИ-дің жылқы және түйе шаруашылығы бөлімінің қызметкерлері енді. Жарыс BR22885681 НҚБ ғылыми жобасы аясында ұйымдастырылды. Жоба мақсаты – Қостанай жылқысының генофондын сақтай отырып, Адай және Қостанай жылқыларының генетикалық ресурстарын басқару әдістерін жетілдіру.